27/06/2018

"Yay Futbol Düşərgəsi"ndə 2-ci mərhələ başa çatıb


"Kapital Bank" ASC, "Paşa Həyat Sığorta" ASC-nin sponsorluğu, Təhsil Nazirliyi, Sumqayıt Şəhər Təhsil Şöbəsi, "Azərikimya" İB-nin dəstəyi və "Sumqayıt" Futbol Klubunun təşkilatçılığı ilə Sumqayıt məktəbliləri üçün "Yay Futbol Düşərgəsi" layihəsinin 2-ci mərhələsi də başa çatıb. Bu gün "Kapital Bank Arena"nın konfrans zalında "Yay Futbol Düşərgəsi" layihəsinin 2-ci mərhələsinin mükafatlandırma mərasimi baş tutub. Tədbirdə “Sumqayıt” FK-nın Prezidenti Riad Rəfiyev, vitse-prezident Vaqif Ömərov, idman direktoru Zamiq Hüseynov, Müşahidə Şurasının sədri Abdulla Məmmədov, futbol veteranı Telman Salahov, əsas komandanın məşqçi heyəti – baş məşqçi Nazim Süleymanov, köməkçiləri Samir Ələkbərov və Emil Babayev və futbolçular – Xəyal Nəcəfov, Süleyman Əhmədov və Tural Bayramlı iştirak edib.

Layihənin yekunu ilə əlaqədar olaraq, bütün iştirakçılara "Sumqayıt" FK-nın idman geyimləri, "Kapital Bank" ASC-nin hazırladığı xüsusi hədiyyələr təqdim edilib.

Qeyd edək ki, ümumilikdə, 48 məktəbdən 100-dən artıq məktəblinin qatılacağı bu layihə 2014-cü ildən "Kapital Bank" və "Paşa Həyat Sığorta"nın sponsorluğu ilə keçirilir və bu müddət ərzində 400-dən çox məktəbli bu seminarın iştirakçısı olub.