03/04/2017

"Futbol və Sağlam Həyat" adlı layihə start götürəcək


"Kapital Bank" ASC və "Paşa Həyat Sığorta" ASC-nin sponsorluğu, Təhsil Nazirliyi, Sumqayıt Şəhər İcra Hakimiyyəti, Sumqayıt Şəhər Təhsil Şöbəsi və "Azərikimya" İB-nin dəstəyi, "Sumqayıt" Futbol Klubunun təşkilatçılığı ilə şəhərin bütün orta təhsil ocaqlarında növbəti dəfə "Futbol və Sağlam Həyat" layihəsi start götürəcək.

Layihəni keçirməkdə əsas məqsəd, gənc və yeniyetmə şagirdləri futbola cəlb etmək, məktəblilərin əla təhsil almalarına stimul yaratmaq, futbolsevərlər arasında bu idman növünün təbliği, futbolun kütləviliyinin artırılması və gənclərimizi sağlama həyata yönləndirməkdir.

"Futbol və Sağlam Həyat" adı altındakı layihənin Sumqayıt şəhərində və onun ətraflarında yerləşən bütün orta təhsil ocaqlarında təhsil alan şagirdlər arasında keçiriməsi nəzərdə tutulub. Seminar tipli layihədə hər təhsil ocağından 10-12 yaş arası əlaçı şagird iştirak edəcək. 

Ümumilikdə, 48 məktəbdən 500-dən artıq məktəblinin qatılacağı layihə 2014-cü ildən "Kapital Bank" və "Paşa Həyat Sığorta"nın sponsorluğu ilə keçirilir və bu müddət ərzində 2000-dən çox məktəbli həmin seminarın iştirakçısı olub.

Aprelin 5-də "Futbol və Sağlam Həyat" adlı layihənin açılış mərasimi baş tutacaq. Tədbir Sumqayıtda 18 saylı orta məktəbdə keçiriləcək. Saat 12:30-da başlanacaq tədbirə bütün KİV nümayəndələri dəvətlidir. Tədbirə gəlmək istəyən media nümayəndələri klubun mətbuat xidməti ilə əlaqə saxlaya bilər.